“Dirilish Ertug‘rul” serialining prodyusseri Mehmet Bo‘zdog‘ "Jaloliddin Xorazmshoh" filmini kelgusi oyda suratga olishni boshlaydi. Bu haqida "O‘zbekkino" milliy agentligi axborot xizmati turk nashrlari tarqatgan xabarlarga tayanib, ma’lum qildi. Unga ko‘ra Mehmet Bo‘zdog‘ ushbu yangi loyiha dunyoga katta ovoz olib kelishini, bu serial turk-o‘zbek do‘stligi mahsuli bo‘lib, katta bir loyihalardan biri ekanini va O‘zbekistonning dunyoga tanilishi uchun katta vazifani bajarishini ta’kidlab o‘tdi. Loyihada taxminan ming kishi ishtirok etadi. O‘zbekistonda va Turkiyada suratga olinadigan film 13 qismdan iborat bo‘lib, har bir bo‘lim 1 soatni o‘z ichiga oladi.
